Nigagan’ny mpanatrika teny amin’ny Lapan’ny Fitsarana Anosy, omaly, ny tombontsoa manokana nomena an’i Andry «Prince de Satan»
sy ireo mpitarika fiangonana niara-voasambotra taminy tamin’ny raharaha
fanalam-baraka nataony tamin’i Dama tao amin’ny tarika Mahaleo.
Nihevitra mihitsy aza angamba ny sasany
hoe nampiasa ny hery miafina izay lazainy fa hananany ity Ranamana ity
sy ireo pasiterana sekta niara-voampanga taminy.
Noloarana tany amin’ny
fonja nitazonana vonjimaika azy mantsy ireto voampanga ireto, hatao
famotorana. Ny nahagaga anefa dia toa zary nogenagenaina sy nomena
fiarovana manokana avy amin’ireo mpiambina ny lapan’ny fitsarana mihitsy
izy ireto na tsy nisy tokony ho natahorana ny ainy akory aza tao
amin’ny fitsarana. Mbola nahagaga ny nanatri-maso ihany koa ny namelana
ireto mpivavaka (mpiangona) avy amin’ity sekta ity hanao izay tiany atao
tao anatin’ity lapan’ny fitsarana ity ihany satria dia afaka nanemotra
ny lalantsara mihitsy izy ireo mba hiarovana ireto voampanga amin’ny
mpanao gazety, fa indrindra amin’ny mpaka sary. Noezahina noho izany ny
tsy hahazoana sary azy ireo ary navilivily nanerana ny lapa mihitsy
hialana ny mpanao gazety. Mbola fahagagana hafa ihany koa satria nony
naverina eny am-ponja izy ireny dia tsy nentina tamin’ny fiara natokana
ho amin’izany tahaka ireo olon-tsotra fa nampidirina tao
an-tokontanin’ny Lapan’ny Fitsarana mihitsy ny fiarany sy ny an’ny
mpanaraka azy avy, hiondranany, hisorohana ny fakana sary ihany…
Hay tsy fahagagana fa toa tsindry bokotra
Teto vao nanomboka
vaky bantsilana ny resaka fa hay tsy fahagagana avy amin’ny hery miafina
fa toa hoe nahazoana baiko avy any ambony ny fanatanterahana izany,
araky ny tsilian-tsofina teny an-toerana ka toa nanamafy ny tsaho efa
niely mikasika ny fananan’ireto voampanga ireto mpiaro matanjaka sy ny
tokony hahazoany fahafahana vonjimaika tamin’iny fotoana iny ihany. Efa
nivonona tamin’izany rahateo koa no fijery ireo mpiara-mivavaka
tamin-dry zareo izay nisomebiseby nameno ny atiny sy ivelany tamin’ny
Lapan’ny Fitsarana ary saika hivadika hahery setra mihitsy rehefa tsy
raikitra io fahafahana vonjimaika nantenaina io.
Raha tsorina tsy nisy
ny fahagagana fa ny tsindry bokotra no mbola manjaka ao amin’ny
fitsarana, zavatra tsy mahagaga tokoa satria efa fomba fanao
hatramin’izay ka mbola mitohy mandrak’ankehitriny.
Tsy hanaiky ry Mahaleo !
Saika tsy hiraharaha
ity resaka ity ihany izahay, hoy ny avy ao amin’ny tarika Mahaleo saingy
voatery niditra amin’izao làlana izao satria niantraika tamin’ny
fiainam-pianakavian’ny tsirairay taminay sy tamin’ny tarika mihitsy no
niafaran’ny fanalam-baraka ka tsy azo noleferina. Tsy ho vahaolana anefa
ny fanagadrana ireo nahavanona izany satria tsy hahafafa ny ratsy
nataony mihitsy izay sazy ho azony. Tsy maintsy hitohy ny fanaparitahana
ireo horonantsary ary ho ambentin-dresaky ny olona foana izahay, hoy
Charle Andrianaivo, nanotrona an’i Dama tamin’io omaly io ka tsy hanaiky
mora izao tetika fanapotehana izao ny tarika. Tsy nisy nitombona
rahateo ny tantara nataon’i Andry saingy tsy mamakafaka tsara koa ny
mpihaino ka andairany. Loza mitatao amin’ny firenena sy ny vakoka anefa
ankehitriny ny fampifangaroan’ireo mpitondra fivavahana tsy mahafehy ny
asany ny fomba sy ny finoana ka tokony hitandrina ny vahoaka mba tsy ho
voafahan-dalitra sy ho hatao vorombe fangala-menaka fotsiny, hoy ireto
avy amin’ny tarika Mahaleo izay mbola nanambara ny fahagagany amin’ny
tsy fihetehan’ny fanjakana eo anoloan’ireny filazan’ity Andry « Prince de satan »
ity fa nihinana nofon-jazakely ny tenany. Tsy nisy akory na sombina
fanadihadiana natao tamin’izany, na marina izany filazany izany na tsia.
Vendredi, 05 Avril 2013
0 commentaires:
Enregistrer un commentaire